کراچی : صوبائی وزیر برائے جامعات و بورڈز اسماعیل راہو نے کہا ہے کہ جامعہ کراچی کو دو لخت نہیں کیا جا رہا ہے بلکہ آئی سی سی بی ایس کو اسناد تقویض کرنے والا ادارہ بنانے کی تجویز ہے جو حتمی نہیں ہے ۔
صوبائی وزیر برائے جامعات و بورڈز اسماعیل راہو نے کہا کہ آئی سی سی بی ایس کے معاملہ میں جامعہ کراچی کے اساتذہ، ملازمین، ڈونرز اور تمام اسٹیک ہولڈرز کو اعتماد میں لیا جائے گا ۔ اسی لیے اس کا بل چارٹر انسپیکشن کمیٹی کو بھیج دیا گیا ہے تاکہ سب کو اعتماد میں لے کر ادارے کو مضبوط اورمستحکم کیا جائے گا۔
وہ جمعرات کو کراچی کے مقامی ہوٹل میں انٹر بورڈ کوآرڈینیشن کمیشن کے اجلاس سے خطاب کر رہے تھے جس سے آئی بی سی سی کے ایگزیکٹو ڈائریکٹر ڈاکٹر غلام علی ملاح، وفاقی تعلیمی بورڈ اسلام آباد کے چیرمین ڈاکٹر اکرام علی اور انٹرمیڈیٹ بورڈ کے چیرمین فقیر محمد لاکھو نے بھی خطاب کیا۔
