تحریر : زاہد احمد
اگر یہ کہا جاٸے کہ پاکستان کے وفاقی و صوباٸی سرکاری ملازمین میں سب سے مظلوم طبقہ ”اساتذہ“ کا طبقہ ہے تو یہ ہرگز غلط نہ ہوگا ۔ اپنے فراٸض ِ منصبی کی اداٸیگی کے علاوہ مردم شماری اور انتخابات کے انعقاد کے عمل میں اساتذہ کا کردار مرکزی و کلیدی ہوتا ہے ، اس ضمن میں اساتذہ تفویض کردہ فراٸض ، قومی فریضہ سمجھتے ہوٸے بحُسن و خوبی خوشدلی ، محنت اور لگن کے جذبے کے تحت سرانجام دیتے ہیں ۔
پاکستان میں بلدیاتی سے لے کر قومی سطح تک کے انتخابات کا انعقاد اساتذہ ٕ کرام کے ہی مرہون ِ منّت ہے ۔ انتخابی فراٸض کی سرانجام دہی میں اساتذہ کا حصّہ نوّے فیصد سے زیادہ ہوتا ہے ، بلکہ اگر یہ کہا جاٸے کہ پاکستان میں کسی بھی انتخاب کا انعقاد ، اساتذہ کی خدمات کے بغیر ممکن ہی نہیں ، تو غلط نہ ہوگا ۔
انتخابات کے انعقاد کے مواقع پر اساتذہ ٕ کرام ، خاص طور پر ”پریزاٸڈنگ افسران“ کی حیثیت سے خدمات سرانجام دینے والے اساتذہ ٕ کرام کو جن تکالیف ، مصاٸب اور مُشکلات سے گزرنا پڑتا ہے ، اس سے اساتذہ بخوبی واقف ہیں ۔ وساٸل کی کمی ، الیکشن کمیشن کی جانب سے عدم ِ تعاون اور انتظامیہ کی غفلت و لاپرواہی ، انتخابی خدمات سرانجام دینے والے سرکاری ملازمین کو شدید ذہنی و جسمانی تکالیف میں مبتلا کردیتی ہیں ۔ راقم الحروف بارہا اس کا شکوہ اور شکایت سوشل میڈیا اور پرنٹ میڈیا پر کرتا رہا ہے ۔
گذشتہ روز پاکستان کی پارلیمنٹ نے پاکستان کے مروّجہ انتخابی قانون (الیکشن ایکٹ) میں کچھ ترامیم کی ہیں ۔ گزشتہ روز کی جانے والی ترامیم میں سے ایک ترمیم کے مطابق اب ”پریزاٸڈنگ افسر“ کو رات دو بجے تک لازمی طور پر اپنے پولنگ اسٹیشن کے نتاٸج ”ریٹرننگ افسر“ اور الیکشن کمیشن کو فراہم کرنے کا پابند بنایا گیا ہے بصورت ِ دیگر اس کےخلاف “فوجداری کارواٸی“ عمل میں لاٸی جاٸیگی ۔
راقم الحروف ، دوران ِ سرکاری ملازمت متعدّد بار بحیثیت ”پریزاٸڈنگ افسر“ انتخابی خدمات سرانجام دینے کا تجربہ رکھتا ہے اور اس امر کا بھرپور ادراک رکھتا ہے ۔
انتخابی نتاٸج کی بروقت تیّاری اور ترسیل کی راہ میں متعدّد مشکلات ، رکاوٹیں اور مساٸل ہوتے ہیں ۔ تجربہ یہ رہا ہے کہ پولنگ کے دن ووٹنگ کے لٸے مختص اوقات میں ووٹرز کا ٹرن آٶٹ کچھ بھی رہا ہو مگر ووٹنگ کا وقت ختم ہونے سے کچھ دیر قبل امیدواران اور سیاسی جماعتوں کی جانب سے ووٹرز کو پولنگ اسٹیشن تک پہنچانے کا رجحان یکسر بڑھ جاتا ہے۔
انتخابی قواعد کے مطابق ایک پریزاٸڈنگ افسر اس امر کا پابند ہوتا ہے کہ ووٹنگ کے وقت کے خاتمے پر پولنگ اسٹیشن کی حدود میں موجود تمام ووٹرز کے ووٹ کاسٹ کرواٸے ، بسا اوقات ایسے ووٹرز کی تعداد اتنی زیادہ ہوتی ہے کہ انہیں ووٹ کاسٹ کروانے میں دو سے تین اضافی گھنٹے بھی لگ جاتے ہیں ۔ انتخابی عمل کے دوران ضابطے کی کاغذی کارواٸی بھی ایک حسّاس ، مشکل ، کٹھن اور وقت طلب عمل ہوتا ہے جس میں غلطی کی کوٸی گنجاٸش نہیں ہوتی اور یہ عمل بھی ”پریزاٸڈنگ افسر“ کو سرانجام دینا ہوتا ہے ۔
دیکھنے میں آیا ہے کہ ووٹنگ کے اوقات کے اختتام کے بعد لا ٕ اینڈ آرڈر کی صورتحال بھی عموماً خراب ہوجاتی ہے جس کو کنٹرول کرنا بھی ”پریزاٸڈنگ افسر“ کے سر تھونپ دیا جاتا ہے ۔ ملک بھر میں لوڈ شیڈنگ ہماری قومی زندگی کاحصّہ بن چکی ہے ، ووٹوں کی گنتی کے دوران بجلی کی عدم ِ دستیابی بھی نتاٸج کی تیاری و ترسیل میں تاخیر کا سبب بن سکتی ہے ۔
انتخابی نتاٸج کی بروقت تیّاری اور متعلقہ ریٹرننگ افسر و الیکشن کمیشن کو ترسیل کی راہ میں دیگر کٸی رکاوٹیں اور دشواریاں حاٸل ہوتی ہیں جن میں ”پریزاٸڈنگ افسر“ یا دیگر انتخابی عملے کا کوٸی قصور نہیں ہوتا اس لٸے انتخابی قوانین میں گزشتہ روز کی جانے والی متذکرہ ترمیم میں ”پریزاٸڈنگ افسر“ کے خلاف ”فوجداری کارواٸی“ نامناسب قدم تصوّر کیا جاٸیگا ۔
