جامعہ کراچی کے وائس چانسلر پروفیسر ڈاکٹر خالد محمودعراقی نے کہا کہ بھارت نے گزشتہ پچھتر سالوں سے کشمیریوں پر مظالم ڈھائے ہوئے ہیں جو انسانیت کے لئے شرمندگی ہے۔
اتنی ظلم اور بربریت کے باوجود بھی وہ نہ ہی کشمیریوں کے عزم وہمت کا مقابلہ کرسکااور ان نہ ہی ان کے حوصلے پست کرسکا۔ بھارتی ظلم وبربریت کے خلاف پوراپاکستان کشمیر کے ساتھ ہے،بھارت کے متعصبانہ اور انسانیت سوز رویے سے نہ صرف مسلمان بلکہ بھارت میں رہنے والی دیگر اکائیاں بھی ظلم وبربریت کا شکارہیں۔
بھارت ظلم وستم اور طاقت کے زورپر کشمیریوں کوآزادی سے محروم نہیں کرسکتا۔جمہوریت کا راگ الاپنے والے بھارت میں جمہوریت نام کی کوئی چیز نہیں ہے جس کا منہ بولتاثبوت بی بی سی کی جانب سے گجرات فسادات کے حوالے سے بنائی جانے والی ڈاکومینٹری پر بھارت میں پابندی ہے کیونکہ بھارت کے موجودہ وزیر اعظم نریندرمودی ہی گجرات فسادات کے مرکزی کردار تھے۔
بھارت کی پالیسیاں ظلم اور بربریت سے بھری ہوئی ہیں اور بھارت کے موجودہ وزیر اعظم نریندرمودی کی پالیسیوں نے انسانیت کا سرشرم سے جھکادیا ہے۔کشمیر میں بھارت کی طرف سے ہونے والے مظالم پر ساری دنیا کو شرمندہ ہوناچاہیئے اور انسانی حقوق کے علمبرداروں کی خاموشی ایک سوالیہ نشان ہے۔
ان خیالات کا اظہار انہوں نے جامعہ کراچی میں انتظامی عمارت کی سبزہ زار پر یوم یکجہتی کشمیرکی مناسبت سے منعقدہ تقریب اور واک سے خطاب کرتے ہوئے کیا۔
واک جامعہ کراچی کی انتظامی عمارت تاآزادی چوک کی کئی جس میں روئسائے کلیہ جات،صدورشعبہ جات،اساتذہ،طلباوطالبات اور انتظامی عملے کی کثیر تعدادنے شرکت کی۔اس موقع پر طلباوطالبات نے ہاتھوں میں پلے کارڈ اور بینرز اُٹھائے ہوئے تھے جس پر کشمیر کی آزادی،ان کے حقوق اور بھارتی مظالم کے خلاف نعرے درج تھے۔
مزید پڑھیں:کمشنر فرمان رسول رضوی کی لیڈر ٹرینر اور اسسٹنٹ لیڈر ٹرینر اسکاؤٹس مقرر ہونے پر مبارکباد
ڈاکٹر خالد عراقی نے شرکاء سے خطاب کرتے ہوئے مزید کہا کہ کشمیر کا مسئلہ صرف مسلمانوں کا مسئلہ نہیں،بلکہ انسانی حقوق کا مسئلہ ہے،میں اس بات پر یقین رکھتا ہوں کہ جوقومیں آزادی کے لئے جدوجہد کرتی ہیں اللہ تعالیٰ انہیں آزادی نصیب فرمادیتے ہیں۔ہمیں صرف یوم کشمیر منانے تک محدود نہیں ہونا چاہیئے کہ بلکہ کشمیر کی آزادی کے لئے دنیا کے ہر فورم پر آوازاُٹھانے کی ضرورت ہے۔
طلبہ کو کشمیر اور اس کی تاریخ کے حوالے سے آگاہی فراہم کرنی چاہیئے تاکہ ہماری نئی نسل کو اس بات کا بخوبی اندازہ ہو کہ کشمیر کا مسئلہ ایک تاریخی مسئلہ ہے اور وہ اپنے حقوق اورآزادی کی جنگ لڑرہے ہیں،کشمیری اس وقت تک سکون اور چھین سے نہیں بیٹھیں گے جب تک وہ آزادی حاصل نہیں کرلیتے۔
