محکمہ تعلیم سندھ کی اسٹیرنگ کمیٹی، جون جولائی کی تعطیلات کے دوران 15 دن کے لیے اساتذہ کی پروفیشنل تربیت، تعلیمی سال اپریل سے شروع کرنے کی تجاویز پیش کیں۔
وزیر تعلیم و ترقی نسواں سندھ رعنا حسین کی زیر صدارت تعلیم کی اسٹیرنگ کمیٹی کا اجلاس منعقد ہوا۔ اس موقع پر سیکریٹری اسکول ایجوکیشن سندھ شیریں ناریجو، سیکریٹری کالج ایجوکیشن سندھ صدف انیس شیخ، ایڈیشنل ڈائریکٹر ڈاکٹر فوزیہ خان اور کمیٹی میمران نے شرکت کی۔
اجلاس میں تعلیمی سال کی شروعات، چھٹیوں، امتحانی شیڈول اور دیگر معاملات کے حوالے سے بات کی گئی۔ اجلاس میں تجویز پیش کی گئی کہ آئیندہ تعلیمی سال 25-2024 اپریل سے شروع ہونا چاہیے۔
تعلیمی سیشن دیر سے شروع ہونے کے سبب انٹرمیڈیٹ کے امتحانی نتائج میں بھی تاخیر ہوتی ہے۔ نتائج میں تاخیر کی وجہ سے طلبہ کو یونیورسٹیز میں داخلہ میں مشکلات کا سامنا ہوتا ہے۔صوبائی وزیر نے اس ضمن میں فیصلہ کے لیے اسٹیرنگ کمیٹی کی ذیلی ورکنگ کمیٹی کو حتمی تجاویز پیش کرنے کی ہدایت کردی۔
اسٹیرنگ کمیٹی کی ورکنگ کمیٹی تمام میمران اور اسٹیک ہولڈرز کے ساتھ مشاورت کے بعد حتمی تجاویز دے گی۔اجلاس میں رواں تعلیمی سال 24-2023 کو اگست سے برقرار رکھنے پر اتفاق کیا گیا۔
صوبائی وزیر تعلیم نے کہا اساتذہ کی کنٹینوئس ڈولپمینٹ یا سیکھنے کے عمل کو جاری رکھنا بے حد ضروری ہے۔اجلاس میں تجویز دی گئی کہ جون جولائی کی چھٹیوں کے دوران 15 دن کے لیے اساتذہ کو اسکولز میں حاضر رہنا ہوگا۔
جون جولائی کی تعطیلات کے دوران اساتذہ کو مختلف کورسز اور تربیتی سیشنز کروائے جائیں گے۔اجلاس میں تعلیمی سال کی جون جولائی کی موسم گرما تعطیلات یکم جون 2024 سے 31 جولائی 2024 کرنے کی تجویز پیش کیا۔
جبکہ موسم سرما کی تعطیلات کے لئے 20 دسمبر 2023 سے 31 دسمبر 2023 تک کرنے کی تجویز دی گئی۔ دیگر چھٹیوں میں یوم کشمیر، شب میراج، شب براءت، یوم پاکستان، یوم علی، شب قدر، لیبر ڈے، عیدالفطر اور عید العضحی، عاشورہ، یوم آزادی، چیہلم، عید میلاد نبی، یوم شاہ عبدالطیف، اور یوم قائد اعظم کی چھٹیوں کو برقرار رکھنے کو کہا گیا۔
اجلاس میں یہ بھی طے کیا گیا کہ ضلعی سطح پر ہونے والی چھٹیوں کے پیشگی نوٹیفکیشن کے لیے انتظامیہ کو پابند بنایا جاۓ گا۔امتحانات کے حوالے سے تجویز دی گئی کہ پہلی کلاس سے تیسری کلاس تک کے بچوں اگلی کلاسز میں پروموٹ کردیا جاۓ گا جبکہ چوتھی کلاس سے آٹھویں کلاس کے طالب علموں سے امتحانات لئے جائیں گے۔ آئندہ تعلیمی سال کے لیے امتحانات 20 مارچ 2024 سے 31 مارچ 2024 لینے کی تجویز پیش کی گئی۔
گیارویں اور بارویں کلاس کے امتحانات 3 اپریل 2024 سے لینے کی تجویز دی گئی میٹرک کے نتائج کا اعلان 31 جولائی 2024 جبکہ کلاس نویں کے امتحانات کے نتائج کے 60 دن بعد میٹرک کے امتحانات کا اعلاج کیا جاۓ گا۔
وزیر تعلیم سندھ رعنا حسین نے کہا کہ کالج کے امتحانات 20 اپریل 2024 کو لینے، جبکہ نتائج کا اعلان 31 اگست 2024 کرنے کی تجویز پیش کیا۔ یہ طے کرنا ہوگا کہ شخصیات کے نام پر چھٹی منانا بہتر ہوگا یا اسکولوں میں بچوں کو حاضر رکھ کر ہم ان کے متعلق بچوں کو بتائیں۔
اسکولوں میں کھیلوں کی سرگرمیوں کے لئے بھی ٹائیم ٹیبل بنایا جاۓ، اس ضمن میں محکمہ کھیل سندھ سے بھی مشاورت کی جاۓ گی۔ہم نصابی سرگرمیوں کے لیے بھی ٹائیم ٹیبل تجویز کر کے دن مخصوص کیے جائیں گے۔ نصاب کے ساتھ ضروری ہے کہ ہم نصابی سرگرمیاں کی جائیں، جس کے لیے ضروری ہے کہ تعلیمی سال میں اسے شیڈول میں شامل کیا جاۓ۔
