کراچی : وفاق المدارس العربیہ پاکستان کے قائدین صدر وفاق مولانا مفتی محمد تقی عثمانی،نائب صدر وفاق مولانا انوار الحق اور ناظم اعلی وفاق المدارس مولانا محمد حنیف جالندھری نے وفاقی وزیر دفاع خواجہ محمد آصف کے مدارس کے بارے میں بیان کو حقائق کے منافی قرار دیا۔انہوں نے کہا کہ خواجہ آصف کی طرف سے اسلام آباد میں ہزاروں مدارس کے قبضے کی زمین پر ہونے کا الزام بالکل بے بنیاد ہے۔
وفاق المدارس کے قائدین نے کہا کہ خواجہ آصف نے غلط اعداد و شمار پیش کر کے انتہائی غیر ذمہ داری کا مظاہرہ کیا ہے اس لئے کہ حقیقت اس کے بالکل برعکس ہے۔ وفاق المدارس کے قائدین نے کہا کہ افغان جہاد ریاست کی پالیسی تھی اس کا الزام مدارس کو نہ دیا جائے۔
انہوں نے کہا کہ پاکستان میں دہشت گردی اور انتہاپسندی خواہ مذہبی، سیاسی، لسانی جس بنیاد پر بھی ہو قابل مذمت ہے ۔ اس کے اصل اسباب پر غور کیا جائے اور مدارس کو بلاوجہ ہدف نہ بنایا جائے۔
وفاق المدارس کے قائدین نے کہا کہ خواجہ آصف نے کچھ ہی عرصہ قبل مدارس کے طلبہ کو وطن عزیز کی سیکنڈ دفاعی لائن قرار دیا تھا اور آج انہوں نے سارا ملبہ مدارس پر ڈالنے کی کوشش کی جو افسوس ناک ہے۔
وفاق المدارس کے قائدین نے میاں محمد نواز شریف اور وزیر اعظم پاکستان میاں شہباز شریف سے خواجہ محمد آصف کے اس غیر ذمہ دارانہ اور سراسر غلط بیان کا نوٹس لینے اور آئندہ کے لیے تمام حکومتی ذمہ داران کو مدارس کے خلاف غیر ذمہ دارانہ بیانات دینے سے روکنے کا مطالبہ کیا۔
