مکة المکرمة: بیت السلام کے طالب علم حافظ ا عظم طارق بن حسن زیب(بونیرچغرزئی بیخانئی والے) وزارت مذہبی امور حکومت پاکستان کے زیر انتظام اسلام آباد میں منعقد ہونے والے فائنل مقابلہ حفظ و قراءت میں پوزیشن حاصل کرنے کے بعد آج کل سعودی عرب حرم مکہ میں جاری حفظ قرآن کریم کےعالمی مقابلے مسابقة الملک عبدالعزیز میں شریک ہیں، الحمد فائنل راؤنڈ میں بھی وہ شامل رہے۔
یاد رہے اس مقابلے میں کامیاب شرکا کیلئے انعام کی تفصیل یہ ہے:پہلی پوزیشن: دو لاکھ ریال، دوسری پوزیشن: ایک لاکھ نوے ہزار ریال، تیسری پوزیشن: ایک لاکھ اسی ہزار ریال، چوتھی پوزیشن: ایک لاکھ ستر ہزار ریال، پانچوں پوزیشن: ایک لاکھ ساٹھ ہزار ریال۔
بیت السلام کیمپس سے تعلق رکھنے والے یہ ننھے حافظ ١٤ سال کی عمر میں اس عالمی مقابلے میں پاکستان کی اکیلے نمائندگی کرتے ہوئے اپنی مسحور کن آواز میں تلاوت اور کم عمر حافظہ میں اپنی خداداد صلاحیت کی بدولت سعودی میڈیا کی توجہ کا مرکز ہیں۔
مختلف میڈیا چینلز وقتا فوقتا اس بچے کا انٹرویو کرکے اس کی تلاوت لائیو نشر کررہے ہیں، جو کہ پاکستان کے لیے اعزاز کی بات ہے۔
واضح رہے کہ حافظ ا عظم طارق گزشتہ ٤ سال سے بیت السلام میں زیر تعلیم ہیں۔
