ڈاکٹر فرزانہ شاہین، سینئر موسٹ ٹینیورڈ پروفیسر، نے بین الاقوامی مرکز برائے کیمیائی و حیاتیاتی علوم (آئی سی سی بی ایس) جامعہ کراچی کے نئے ڈائریکٹر کا چارج لے لیا ہے۔
جامعہ کراچی کے رجسٹرار پروفیسر ڈاکٹر عبدالوحید کے جاری کردہ ایک سرکاری خط کے مطابق ڈاکٹر فرزانہ شاہین کو بین الاقوامی مرکز جامعہ کراچی کے ایگزیکٹو بورڈ کی4 ستمبر کو منعقدہ ایک اجلاس میں پیش کردہ سفارش کے تحت تین مہینے کی مدت کے لیے ادارے کا ڈائریکٹر مقرر کیا گیا ہے۔
آئی سی سی بی ایس، جامعہ کراچی کے ترجمان کے مطابق پروفیسر فرازنہ شاہین نے ایم ایس سی اور ایم فل قائد اعظم یونیورسٹی اسلام آباد سے بالترتیب1993اور1995میں مکمل کیا جبکہ ایم فل میں چانسلر گولڈ میڈل بھی حاصل کیا تھا، انھوں نے ایچ ای جے ریسرچ انسٹیٹوٹ آف کیمسٹری جامعہ کراچی سے پی ایچ ڈی کیا۔
پروفیسر فرازنہ شاہین کو ملائیشیا میں ’ایل لوریل یونیسکو فیلوشپ فار ینگ ومن سائینسٹسٹ ایوارڈ2011 ء جبکہ پاکستا ن میں پاکستان اکیڈمی آف سائینسز گولڈ میڈل2012 ء جیتنے کا اعزاز بھی حاصل ہے۔ ان کے تحقیقی کام کے بدولت ان کی90 تحقیقی اشاعتیں غیر ملکی جرائد میں شائع ہوئی ہیں جبکہ9 پیٹنٹ ان کے نام ہیں۔
