کراچی : کراچی ورلڈ بک فیئر (KWBF) 202518 دسمبر بروز جمعرات سے کراچی ایکسپو سینٹر میں شروع ہو رہا ہے ۔ پانچ روزہ اس عالمی کتاب میلے میں پاکستان کے 140 معروف پبلشرز اور کتاب فروشوں کے علاوہ 17 ممالک سے تعلق رکھنے والے 40 غیر ملکی نمائش کنندگان بھی شرکت کریں گے۔
صوبائی وزیرِ تعلیم و خواندگی سندھ، سید سردار علی شاہ 18 دسمبر کو کراچی ورلڈ بک فیئر کا افتتاح بطور مہمانِ خصوصی کریں گے، جبکہ آرٹس کونسل آف پاکستان کے صدر محمد احمد شاہ مہمانِ اعزاز ہوں گے۔ بک فیئر کے اوقات روزانہ صبح 10 بجے سے رات 9 بجے تک ہوں گے ۔
کنوینر کراچی ورلڈ بک فیئر وقار متین خان نے پاکستان پبلشرز اینڈ بک سیلرز ایسوسی ایشن کے چیئرمین کامران نورانی کے ہمراہ پیر کو کراچی کے مقامی ہوٹل میں پریس کانفرنس کرتے ہوئے کہا کہ ترکی، سنگاپور، چین، ملائیشیا، برطانیہ، متحدہ عرب امارات سمیت دیگر ممالک کے پبلشرز اس عالمی ادبی میلے میں شرکت کر رہے ہیں ، جس نے کراچی ورلڈ بک فیئر کو پاکستان کا سب سے بڑا اور اہم ادبی ایونٹ بنا دیا ہے ۔
کراچی ورلڈ بک فیئر ایکسپو کے ہال نمبر 1، 2 اور 3 میں منعقد ہو گا۔ اس سال بک فیئر میں 325 سے زائد اسٹالز لگائے جائیں گے جب کہ 5 لاکھ سے زائد شائقینِ کتب کی آمد متوقع ہے ۔ یہ میلہ ایونٹ اینڈ کانفرنس انٹرنیشنل پرائیویٹ لمیٹڈ کے زیرِ اہتمام پاکستان پبلشرز اینڈ بک سیلرز ایسوسی ایشن (PPBA) کے تعاون سے منعقد کیا جا رہا ہے ۔
کنوینر کراچی ورلڈ بک فیئر وقار متین خان نے مزید کہا کہ یہ میلہ ملکی و غیر ملکی پبلشرز، کتاب فروشوں، لائبریرینز اور ادارہ جاتی خریداروں کو ایک پلیٹ فارم پر اکٹھا کرتا ہے۔ انہوں نے کہا کہ قارئین کو قومی و بین الاقوامی سطح کی بہترین کتابوں تک رسائی حاصل ہوگی جبکہ مصنفین کو پبلشرز سے براہِ راست ملاقات کا موقع بھی ملے گا۔
پاکستان پبلشرز اینڈ بک سیلرز ایسوسی ایشن کے چیئرمین کامران نورانی نے کہا کہ اس سال کا ایڈیشن منفرد اور یادگار ہو گا، کیونکہ بین الاقوامی بک فیئرز کے ساتھ پیشہ ورانہ تعاون اور تجربات کے تبادلے پر خصوصی توجہ دی جا رہی ہے۔
انہوں نے بتایا کہ میلے کے دوران معروف مصنفین کی کتابوں کی رونمائی، بک لانچنگ تقریبات اور بچوں کے لیے ڈرائنگ، تقریر، تقاریر، کوئزز اور دیگر دلچسپ مقابلے بھی منعقد ہوں گے۔
پریس کانفرنس میں ڈپٹی کنوینر سید ناصر حسین، نائب چیئرمین ندیم مظہر، احسن جعفری، محمد اقبال غازیانی ، اقبال صالح محمد، ندیم اختر، سلیم عبدالحسین، حوری نورانی، ارسلان متین خان، راشد الحق اور شیخ جمال الدین بھی موجود تھے ۔
