کراچی (اسپورٹس رپورٹر) سر سید یونیورسٹی آف انجینئرنگ اینڈ ٹیکنالوجی کے اسپورٹس ڈپارٹمنٹ کے زیر انتظام ایس ایس یو ای ٹی انٹر ہاؤسز اسپورٹس گالا کا گزشتہ روز رنگا رنگ اور شاندار تقریب میں آغاز ہو گیا۔
افتتاحی تقریب کے مہمان خصوصی پاکستان سپر لیگ کی چیمپئن لاہور قلندرز کے اونر اور سی ای او عاطف رانا تھے جنہوں نے سرسید یونیورسٹی کے وائس چانسلر پروفیسر ڈاکٹر ولی الدین کے ہمراہ ایونٹ کا افتتاح کیا۔
اس موقع پر ایونٹ میں شریک ہاؤسز کے کھلاڑیوں نے مارچ پاسٹ کیا جبکہ یونیورسٹی کے سینئر کھلاڑی نے حلف بھی اٹھایاجس کے بعد باقاعدہ مقابلوں کا آغاز ہوگیا۔افتتاحی تقریب میں یونیورسٹی کے رجسٹرار کموڈور(ر)سید سرفراز علی،ہائر ایجوکیشن کمیشن کے ڈائرکٹر اسپورٹس جاوید علی میمن،سندھ اولمپک ایسوسی ایشن کے سیکریٹری احمد علی راجپوت،انٹر نیشنل محمد علی،ابو ذر امراء،معروف اسپورٹس اینکر یحییٰ حسینی،سندھ والی بال ایسوسی ایشن کے سیکریٹری شاہد مسعود، ڈین فیکلٹی آف سول انجینئرنگ اینڈ آرکیٹکچر پروفیسر ڈاکٹر میر شبر علی، ڈین فیکلٹی آف کمپیوٹنگ اینڈ اپلائیڈ سائنسز پروفیسر ڈاکٹر محمد آصف، کنوینئر اسپورٹس قاضی نصر عباس، ڈائریکٹر اسپورٹس مبشر مختار، حمید بلوچ،کے ایچ اے کے چیئرمین گلفراز خان و دیگربھی موجود تھے۔
تقریب سے خطاب کرتے ہوئے مہمانِ خصوصی، لاہور قلند رکے چیف ایگزیکیٹو عاطف رانا نے کہا کہ کھیلوں کی سرگرمیاں نوجوانون کی تخلیقی اور پیداواری صلاحیتوں کو نکھارتی ہیں۔کھیلوں کا فروغ اور ان کی سرپرستی ہماری اولین ترجیح ہونی چاہئے کیونکہ کھیل صحتمند قوم تشکیل دیتے ہیں۔
یونیورسٹی لیگ بھی شروع کی جانی چاہئے تاکہ یہاں سے بھی ایک قلندر نکل کر سامنے آئے۔انہوں نے وعد کیا کہ وہ اگلی سپرلیگ کے موقع پر ممتاز کرکٹر حارث رؤ ف کو سرسید یونیورسٹی لے کر آئیں گے۔اس کے علاوہ اسپورٹس گالا کی فاتح ٹیم کو کراچی میں سپر لیگ کے میچز دیکھنے کے لیے مدعو کیا جائے گا۔
اس موقع پر اظہارِ خیال کرتے ہوئے سرسید یونیورسٹی کے وائس چانسلر پروفیسر ڈاکٹر ولی الدین نے کہا کہ اسپورٹس گالا باہمی تعلقات بڑھانے، ہم آہنگی اور بھائی چارہ پیدا کرنے میں اہم کردار ادا کرے گا۔سرسید یونیورسٹی میں اسپورٹس پر بھرپور توجہ دی جاتی ہے اور طلباء کی صلاحیتوں کو نکھارنے اور کھیلوں کے مقابلوں میں فتح حاصل کرنے کے لیے انہیں تمام ضروری مراعات و سہولیات فراہم کی جاتی ہیں۔
سرسید یونیورسٹی نہ صرف جامعہ کے کھیلوں کا انعقاد کرتی ہے بلکہ قومی سطح پر ہائر ایجوکیشن کے ایونٹس بھی آرگنائز کرتی ہے۔کھیلوں میں ہار جیت کوئی معنی نہیں رکھتی، اصل چیز اسپورٹس مین اسپرٹ ہے۔اس موقع پر ہائر ایجوکیشن کمیشن کے اسپورٹس ڈائریکٹر جاوید علی میمن اور ڈین فیکلٹی آف الیکٹریکل اینڈ کمپیوٹر انجینئرنگ پروفیسر ڈاکٹر محمد عامرنے بھی خطاب کیا،قبل ازیں خطبہ استقبالیہ پیش کرتے ہوئے سرسید یونیورسٹی کے رجسٹرار کموڈور (ر) سید سرفراز علی، ستارہ امتیاز ملٹری، نے خطبہ استقبالیہ پیش کیا۔
واضح رہے کہ انٹر ہاؤس اسپورٹس گالا میں اس سال تقریباََ 15 کھیلوں کے مقابلے رکھے گئے ہیں جن میں رسہ کشی، والی بال، تھرو بال، باسکٹ بال، بیڈمنٹن، ہاکی، ٹیبل ٹینس، کرکٹ، فٹسال، آرم ریسلنگ، تن سازی، شطرنج، ڈارٹ گیمز، 100میٹر ریس اور اسنوکر شامل ہیں۔اسپورٹس گالا کے مقابلوں میں حصہ لینے کے لیے 4ہاؤسز تشکیل دئے گئے ہیں جس میں قائدِ اعظم ہاؤس، علامہ اقبال ہاؤس، سرسید احمد خان ہاؤس اور لیاقت علی خان ہاؤس شامل ہیں۔
فوٹو کیپشن:سر سید یونیورسٹی کے انٹرہاؤس اسپورٹس گالا کی افتتاحی تقریب میں وائس چانسلر پروفیسر ولی الدین اور رجسٹرا ر کموڈور(ر) سید سرفراز علی مہمان خصوصی لاہور قلندرز کے اونر عاطف رانا کو شیلڈ دے رہے ہیں،جاوید میمن،ڈاکٹر میر شیر علی،ڈاکٹر محمد عامر،ڈائرکٹر اسپورٹس مبشر مختار بھی موجود ہیں۔
