26 ممالک کے سائنسدان شرکت کرینگے، پنجوانی سینٹر جامعہ کراچی میں پروفیسر فرزانہ شاہین کا اجلاس سے خطاب
نگراں صوبائی وزیرِصحت سمپوزیم کا افتتاح اور شیخ الجامعہ کراچی پروفیسر خالد عراقی،پروفیسر عطا الرحمن خطاب کرینگے
کراچی: ڈاکٹر پنجوانی سینٹر برائے مالیکیور میڈیسن اور ڈرگ ریسرچ (پی سی ایم ڈی) جامعہ کراچی کے زیرِ اہتمام مالیکیولر میڈیسن اور ڈرگ ریسرچ کے موضوع پر 4 روزہ آٹھواں بین الاقوامی سمپوزیم کم ٹریننگ کورس(27تا30نومبر) پیر سے بین الاقوامی مرکز برائے کیمیائی و حیاتیاتی علوم(آئی سی سی بی ایس) جامعہ کراچی میں شروع ہو رہاہے جس میں 26 ممالک کے 70 غیر ملکی سائینسدانوں سمیت 600 سے زائد سائنسدانوں اور محققیں کی شرکت متوقع ہے۔
نگراں صوبائی وزیرِصحت و بہبودِآبادی ڈاکٹر سعدخالد نیاز سمپوزیم کا افتتاح کریں گے۔ یہ بات آئی سی سی بی ایس جامعہ کراچی کی سربراہ پروفیسر ڈاکٹر فرزانہ شاہین نے جمعہ کو ڈاکٹر پنجوانی سینٹر میں سمپوزیم کی انتظامی کمیٹی کے اجلاس کے دوران کہی۔
انھوں نے اس اُمید کا اظہار کیا کہ اس سمپوزیم کے انعقاد سے شرکاء سائینسدانوں میں مضبوط تحقیقی روابط قائم ہوں گے۔ انھوں نے کہا اس بین الاقوامی سمپوزیم کے انعقاد کا مقصد مالیکیولر میڈیسن کے شعبے میں دنیا بھر سے ماہرین کو نہ صرف یکجا کرنا ہے بلکہ ان کے تجربات و معلومات سے استفادہ بھی کرنا ہے تاکہ متعلقہ شعبہ میں ترقی کی رفتار تیز تر ہوسکے۔
آئی سی سی بی ایس جامعہ کراچی کے ترجمان کے مطابق سمپوزیم کی افتتاحی تقریب پیر کو صبح نوبجے آئی سی سی بی ایس جامعہ کراچی کے پروفیسر سلیم الزماں صدیقی آڈیٹوریم میں ہوگی۔
نگراں صوبائی وزیرِصحت و بہبودِآبادی ڈاکٹر سعدخالد نیاز سمپوزیم کی افتتاحی تقریب میں خصوصی خطاب کرینگے جبکہ تقریب میں شیخ الجامعہ کراچی پروفیسر ڈاکٹر خالد محمود عراقی، سابق وفاقی وزیر برائے سائینس اور ٹیکنالوجی اور پروفیسرامریطس ڈاکٹر عطا الرحمن، کامسٹیک کے کوارڈینیٹر جنرل اور ادویاتی اور بائیو آرگینک نیچرل پروڈکٹ کیمسٹری پر قائم یونیسکو چیئر کے نگراں (چیئر ہولڈر) پروفیسر ڈاکٹرمحمد اقبال چوہدری، آئی سی سی بی ایس جامعہ کراچی کی سربراہ پروفیسر ڈاکٹر فرزانہ شاہین، حسین ابراہیم جمال فاونڈیشن کے سربراہ عزیز جمال، ڈاکٹر پنجوانی میموریل ٹرسٹ کی چیئرپرسن محترمہ نادرہ پنجوانی سمیت سمپوزیم کی کوآرڈینیٹرپروفیسر ڈاکٹر عصمت سلیم بھی اس موقع پر اپنے خیالات کا اظہار کریں گی۔
ترجمان کے مطابق سمپوزیم پلینری لیکچرز، پوسٹر پریزنٹیشن اورمالیکیولر میڈیسن پر بین الاقوامی شہرت یافتہ سائنسدانوں کے لیکچرز پر مشتمل ہے، جبکہ اس سمپوزیم کا تربیتی کورس مالیکیولر میڈیسن اور امراض کو سمجھنے کے حوالے سے اس کے ا ستعمال سے متعلق قائم ہونے والے تصورات کا احاطہ کریگا۔
