دیامر (فخر عالم قریشی) واپڈا کی جانب سے دیامر میں تعلیم کے فروغ کے لیے ایک اہم اقدام کے تحت، واپڈا کیڈٹ کالج تربیلا نے کلاس ہشتم میں داخلے کا اعلان کر دیا ہے۔
چیئرمین واپڈا لیفٹیننٹ جنرل (ر) سجاد غنی کی خصوصی ہدایت پر دیامر کے طلبا کے لیے 10 نشستیں مختص کی گئی ہیں۔ دیامر کے طلبا جو کلاس ہفتم پاس کر چکے ہیں یا اس وقت پڑھ رہے ہیں اور ان کی عمر 12 سے 14 سال کے درمیان ہے، وہ داخلے کے لیے درخواست دے سکتے ہیں۔
ایڈمیشن فارم جمع کرانے کی آخری تاریخ 21 ستمبر 2024 مقرر کی گئی ہے، جبکہ تحریری ٹیسٹ 12 اکتوبر کو گلگت میں منعقد ہو گا۔ داخلہ کے اہل قرار پانے والے 10 طلبا کو کلاس ہشتم میں داخلہ دیا جائے گا اور کلاسز کا اجرا اپریل 2025 سے ہو گا۔ ایڈمیشن فارم اور بینک چالان کالج کی ویب سائٹ یا واپڈا پراجیکٹ آفس چلاس سے حاصل کیے جا سکتے ہیں۔
واپڈا نے دیامر میں تعلیم کے فروغ کے لیے کئی اقدامات کیے ہیں، جن میں چلاس میں کیڈٹ کالج کا قیام، تھور میں آرمی پبلک اسکول کا آغاز، اور دیگر تعلیمی منصوبے شامل ہیں۔ ان اقدامات کا مقصد پراجیکٹ ایریا میں تعلیم کو فروغ دینا اور مقامی طلبا کو بہتر تعلیمی مواقع فراہم کرنا ہے۔
