کراچی : وزیر تعلیم سندھ سید سردار علی شاہ سے گرینڈ الائینس آف پرائیویٹ اسکولز ایسوسی ایشنز کے وفد کی ملاقات ہوئی ، جس میں مسائل حل کرنے کی یقین دہانی پر نجی اسکولز ایسوسی ایشن نے 9 جنوری کی اعلان کردہ ہڑتال کے فیصلے کو واپس لینے کا اعلان کر دیا۔
ملاقات کے موقع پر چیئرمین اینٹی کرپشن اسٹیبلشمنٹ ذوالفقار علی شاہ، سیکریٹری اسکول ایجوکیشن زاہد علی عباسی، ڈائریکٹر جنرل پرائیویٹ اسکولز محمد افضال، ایڈیشنل ڈائریکٹر رفیعہ ملاح اور دیگر افسران بھی موجود تھے۔ وفد نے سندھ میں پرائیویٹ تعلیمی اداروں کے طلباء کی فری شپ ڈیٹا کی تصدیق کے طریقہ کار پر تحفظات کا اظہار کیا ۔
وفد کا موقف تھا کہ اینٹی کرپشن کے ذریعے تصدیق کے عمل پر گرینڈ الائنس آف پرائیویٹ اسکولز ایسوسی ایشنز سندھ کے بہت سے خدشات اور تحفظات ہیں ۔ تفشیش میں اور ڈیٹا کی ویر فکیشن کے طریقے میں فرق ہوتا ہے۔ ڈیٹا وریفکیشن کے نام پر اسکول انتظامیہ اور والدین کے ناروا سلوک رکھا گیا۔
صوبائی وزیر تعلیم نے کہا کہ گرینڈ الائینس آف پرائیویٹ اسکولز ایسوسی ایشنز کے وفد کے خدشات کا احترام ہے ۔ڈیٹا ویریفکیشن کا مکینزم کا طریقہ طے نہ ہونے کی وجہ نجی اسکول انتظامیہ کو مسائل درپیش آۓ۔ ملاقات میں اینٹی کرپشن کی تصدیق کے مربوط طریقہ کار پر اتفاق کیا گیا ۔
اسکولز اور والدین کے تمام خدشات کا مکمل خیال رکھا جائے گا تا کہ اسکول منتظمین کو کسی قسم کی پریشانی کا سامنا نہ ہو۔ وزیر تعلیم سندھ سید سردار علی شاہ نے پرائیویٹ اسکولز کے سندھ کی تعلیم میں مثبت کردار کو سراہتے ہیں ۔
حکومت کے ساتھ ساتھ لاکھوں بچوں کی تعلیم کی ذمہ داری پرائیویٹ انسٹیٹیوشنز نے لی ہوئی ہے۔ وزیر تعلیم سندھ نے وفد کے رہنماؤں کو یقین دلایا کہ وہ پرائیویٹ ایجوکیشن سیکٹر کے مسائل اور مشکلات کو حل کرنے کی پوری کوشش کریں گے۔ بچوں کی تعلیم کسی صورت بھی متاثرہ نہیں ہونی چاہیے۔ ڈائریکٹوریٹ آف انسپیکشن اینڈ رجسٹریشن آف پرائیویٹ انسٹی ٹیوشن کے ذریعے ڈیٹا کی تصدیق کے تمام معاملات حل کیے جائیں گے۔
گرینڈ الائنس آف پرائویٹ اسکولز ایسوسی ایشنز سندھ کے رہنماؤں نے وزیر تعلیم سندھ سید سردار علی شاہ کی یقین دہانی اور چئیرمین اینٹی کرپشن ذوالفقار علی شاہ سے اتفاق کرتے ہوئے احتجاج کو فوری طور پر ختم کرنے کا اعلان کیا۔ وفد کی طرف سے جمعہ 9 جنوری کی اعلان کردہ ہڑتال کے فیصلے کو واپس لینے کا اعلان کیا ہے ۔
