اسلام آباد : ایسوسی ایشن آف پرائیویٹ سیکٹر یونیورسٹیز آف پاکستان نے وزیر اعظم شہباز شریف کو خط لکھ کر مطالبہ کیا ہے کہ ہائر ایجوکیشن کمیشن آرڈیننس 2002 کی اصل روح، اغراض و مقاصد کو برقرار رکھا جائے اور اسٹیک ہولڈرز کی مشاورت کے بغیر کوئی قانون منظور نہ کیا جائے ۔
ایسوسی ایشن کے صدر پروفیسر ڈاکٹر چوہدری عبدالرحمن کی طرف سے لکھے گئے خط میں درخواست کی گئی ہے کہ مجوزہ بل اور دیگر تمام بل جو ایچ ای سی کی خود مختاری کو محدود کرتے ہیں، مزید کارروائی کے لیے روکے جائیں جو کہ ملک کے بہترین مفاد میں ہے ۔
مذید پڑھیں : انجمن اساتذہ جامعہ کراچی کے وفد کی جامعہ اردو اساتذہ احتجاج میں شرکت
اے پی ایس پی نے اسلام آباد میں تیسری ریکٹرز کانفرنس 2022 کی میزبانی کی ۔ اس میگا ایونٹ میں ملک کی سرکاری اور نجی یونیورسٹیوں کے 100 سے زائد وائس چانسلرز اور ریکٹرز نے شرکت کی ۔
کانفرنس کے شرکاء نے متفقہ طور پر ایچ ای سی آرڈیننس 2002 میں ترامیم کی مخالفت کی ۔
کانفرنس میں یہ سفارش بھی کی گئی کہ وائس چانسلرز اور ریکٹرز کو سفارتی پاسپورٹ جاری کیے جائیں تاکہ ویزا کے عمل میں تاخیر سے بچا جا سکے تاکہ بین الاقوامی روابط اور عالمی درجہ بندی کے قیام میں بین الاقوامی شناخت کو یقینی بنایا جا سکے ۔
