کراچی : جامعہ کراچی نے اعلان کیا ہے کہ مالی مشکلات کی وجہ سے داخلہ فیس دینے سے قاصر طلبہ کی فیس ایڈمیشن فنڈ سے فراہم کی جائے گی ۔ طلبا و طالبات 05 جنوری 2023 ء تک ایڈمیشن فنڈ کے کاؤنٹر سے فارم حاصل کر کے جمع کرا سکتے ہیں ۔
انچارج ڈائریکٹوریٹ آف ایڈمیشنز جامعہ کراچی ڈاکٹر صائمہ اختر کے مطابق ایسے طلبا و طالبات جو محض مالی مشکلات کی وجہ سے داخلہ فیس دینے سے قاصر ہیں وہ 05 جنوری 2023 ء تک صبح 10:00 تاشام 4:00 بجے تک جمنازیم ہال جامعہ کراچی میں واقع اسٹوڈنٹس ایڈمیشن فنڈ کے کاؤنٹر سے فارم حاصل کر کے جمع کرا سکتے ہیں ۔
مذید پڑھیں : عدالتی حکم پر جامعہ کراچی سینڈیکیٹ نے 5 لیکچررز کے تقرر کی منظوری دے دی
ایسے طلبہ جو اسٹوڈنٹس ایڈمیشن فنڈ سے استفادہ کرنا چاہتے ہیں وہ فارم کے ساتھ والد/ سربراہ کے ذرائع آمد ن کے سرٹیفیکٹ، دیگر متعلقہ دستاویزات، طالبعلم،والد/ سرپرست کی شناختی کارڈ کی فوٹو کاپی، ب فارم کی فوٹوکاپی اور گذشتہ ماہ کے یوٹیلیٹی بلز جس میں بجلی، گیس، پانی، ٹیلی فون و دیگر شامل ہیں منسلک کریں ۔
ڈاکٹر صائمہ اختر نے بتایا کہ شیخ الجامعہ پروفیسرڈاکٹر خالد محمود عراقی کی خصوصی ہدایت ہے کہ حصول علم کے خواہش مند طلبا و طالبات کا محض مالی مشکلات کی وجہ سے تعلیمی سال ضائع نہیں ہونا چاہیئے اور مذکورہ فنڈ کا قیام اسی سلسلے کی ایک کڑی ہے۔ ایسے طلبا و طالبات جو محض مالی مشکلات کی وجہ سے داخلہ فیس دینے سے قاصر ہیں ان کی داخلہ فیس مذکورہ فنڈ سے فراہم کی جائے گی۔
