کراچی : جناح سندھ میڈیکل یونیورسٹی (جے ایس ایم یو) میں ایم بی بی ایس بیچ 2026 کے لیے دو روزہ اورینٹیشن پروگرام کا انعقاد کیا گیا، جس میں نئے طلبہ اور ان کے والدین کو جامعہ کے تعلیمی نظام، اقدار اور سہولیات سے آگاہ کیا گیا ۔ یہ پروگرام طب کے معزز پیشے میں طلبہ کے تعلیمی سفر کے آغاز کی علامت تھا ۔
تقریب کا آغاز وائس چانسلر پروفیسر امجد سراج میمن کے خیرمقدمی خطاب سے ہوا۔ انہوں نے کہا کہ اورینٹیشن طالب علم کی زندگی کے یادگار دنوں میں سے ایک ہوتی ہے۔ انہوں نے طلبہ کو انسانی جان کے تحفظ، اعلیٰ تعلیم کے حصول، طلبہ سرگرمیوں میں حصہ لینے اور عوامِ پاکستان کی خدمت کی تلقین کی، جب کہ دستیاب وظائف سے بھی آگاہ کیا ۔
سندھ میڈیکل کالج کی پرنسپل پروفیسر ڈاکٹر امبرین عثمانی نے طلبہ کا خیر مقدم کرتے ہوئے جامعہ کے قواعد، حاضری کے اصول اور نصاب پر روشنی ڈالی۔ فیکلٹی آف بیسک میڈیکل سائنسز کی ڈین پروفیسر فرح جاوید نے طبی شعبے میں کامیابی کے لیے ذمہ داری اور محنت کی اہمیت پر زور دیا۔ پہلے دن کی نمایاں سرگرمی رجسٹرار ڈاکٹر اعظم خان کی زیر نگرانی علامتی حلف برداری تھی، جس کے ذریعے طلبہ کو طبی برادری میں شامل کیا گیا اور پیشہ ورانہ اقدار، ہمدردی اور معیار کی پاسداری کا عہد دہرایا گیا ۔
امتحانات اور ترقی کے قواعد کنٹرولر امتحانات ڈاکٹر فوزیہ امتیاز نے بیان کیے، جبکہ طلبہ امور کی ڈائریکٹر محترمہ زہرہ سیمین نے طلبہ کو دستیاب سہولیات سے آگاہ کیا۔ شعبہ جات کے سربراہان پروفیسر ڈاکٹر صدف حا مد ، پروفیسر ڈاکٹر آصف میمن اور پروفیسر ڈاکٹر صائمہ نے اپنے شعبہ جات کی اہمیت پر روشنی ڈالی ۔ والدین کے لیے علیحدہ ہال میں تقریب دیکھنے کا انتظام کیا گیا تاکہ وہ اس اہم موقع میں شریک ہو سکیں۔
پیشہ ورانہ مہارت مرکز اور مہارت آموزی لیبارٹری کا تعارف ڈاکٹر آمنہ انظر نے کرایا، جبکہ ڈاکٹر حسن شاہد نے وظائف اور رہنمائی سے متعلق آگاہی سیشن دیا۔ اخلاقی ذمہ داریوں اور پالیسیوں پر ڈاکٹر تفضل زیدی اور ڈائریکٹر کیو ای سی ڈاکٹر عبد الواحد عثمانی نے روشنی ڈالی، جنہوں نے جامعہ کی ہراسانی سے متعلق پالیسی اور اعلیٰ تعلیمی ہدایات کی وضاحت کی۔
ابلاغ عامہ سے محترمہ آصفیہ عزیز نے میڈیا اور ابلاغ کی پالیسی بیان کی اور جامعہ کو محفوظ تعلیمی ماحول قرار دیا۔ خاندانی طب کا تعارف ڈاکٹر کرن عبد الستار نے کرایا اور طلبہ صحت سے متعلق امور پر گفتگو کی۔ دو روزہ پروگرام کے اختتام پر طلبہ کو جامعہ کے تعلیمی تقاضوں، سہولیات اور اخلاقی بنیادوں سے مکمل آگاہی حاصل ہوئی، جو ان کے طبی کیریئر کے لیے رہنمائی ثابت ہو گی۔
