کراچی : داؤد یونیورسٹی آف انجینئرنگ اینڈ ٹیکنالوجی (DUET) کراچی کے مالیاتی نظم و نسق، قانونی تعمیل اور ڈائریکٹر فنانس کے عہدے میں بار بار خالی آسامیوں کے حوالے سے ایک وائٹ پیپر وزیر اعلیٰ سندھ کے غور کے لیے جمع کرایا گیا ہے۔
8 صفحات پر مشتمل یہ وائٹ پیپر DUET ایکٹ 2013 (ترمیم شدہ 2018) اور DUET فنانشل اسٹیٹیوٹس 2021 کی بنیاد پر تیار کیا گیا ہے۔ دستاویز میں کہا گیا ہے کہ اس میں شامل تاریخی تقرریوں اور استعفوں کی تفصیلات کو حتمی کارروائی سے قبل سرکاری احکامات اور نوٹیفکیشنز سے کراس چیک کیا جانا ضروری ہے۔
وائٹ پیپر کے مطابق اس وقت یونیورسٹی میں صورتحال خاص طور پر حساس ہے کیونکہ ڈائریکٹر فنانس کا عہدہ خالی ہے، چیف اکاؤنٹنٹ کا عہدہ خالی ہے اور ریزیڈنٹ آڈیٹر اضافی چارج پر کام کر رہے ہیں۔
دستاویز میں دعویٰ کیا گیا ہے کہ گزشتہ ایک ماہ سے یونیورسٹی بغیر کسی باقاعدہ ڈرائنگ اینڈ ڈسبسنگ آفیسر (DDO) کے چل رہی ہے اور اس دوران کروڑوں روپے کی ادائیگیاں کی گئی ہیں۔ وائٹ پیپر میں مزید کہا گیا ہے کہ مبینہ طور پر رجسٹرار اور ایک ڈین کی جانب سے یونیورسٹی کے چیکس پر دستخط کیے جا رہے ہیں جبکہ ڈپٹی ڈائریکٹر فنانس کی جانب سے ڈائریکٹر فنانس کے طور پر اکاؤنٹس بکس پر دستخط کرنے کا معاملہ بھی اٹھایا گیا ہے، جس کے قانونی اختیار کی تصدیق کی ضرورت ہے۔
وائٹ پیپر کے ایک حصے میں 4 افراد کے حوالے سے الزامات عائد کیے گئے ہیں جن میں وائس چانسلر، رجسٹرار، ایک ڈین اور ڈپٹی ڈائریکٹر فنانس شامل ہیں۔ دستاویز میں خود واضح طور پر لکھا گیا ہے کہ یہ تمام الزامات بشمول پروکیورمنٹ، مفادات کے ٹکراؤ، فرنٹ کمپنیوں اور فنڈز کے مبینہ غلط استعمال کے معاملات *آزادانہ تصدیق کے متقاضی ہیں* اور انہیں سرکاری دستاویزات، مالی ریکارڈ اور پروکیورمنٹ ریکارڈ سے ویریفائی کیا جانا چاہیے۔
وائٹ پیپر میں حکومت سندھ سے استدعا کی گئی ہے کہ:
1. ڈائریکٹر فنانس کی بار بار خالی آسامیوں، موجودہ خالی عہدوں اور اضافی چارج کے انتظامات کی تحقیقات کے لیے *اسپیشل فنانشل، کمپلائنس اینڈ گورننس آڈٹ اور فیکٹ فائنڈنگ انکوائری* کا حکم دیا جائے۔
2. یونیورسٹیز اینڈ بورڈز ڈپارٹمنٹ، فنانس ڈپارٹمنٹ کے اشتراک سے ایک آزاد آڈٹ ٹیم تشکیل دے۔
3. انکوائری کے دوران تمام ٹینڈرز اور کنٹریکٹس، ان کے اصل بینیفشل اونرز اور DDO اتھارٹی کی قانونی حیثیت کا جائزہ لیا جائے۔
4. ہر اس شخص کو جس کے بارے میں سوال اٹھایا گیا ہے، اپنا موقف پیش کرنے اور دستاویزی ثبوت دینے کا پورا موقع دیا جائے۔
وائٹ پیپر میں تجویز دی گئی ہے کہ انکوائری مکمل ہونے اور مستقل مالیاتی افسران کی تعیناتی تک تمام مالیاتی امور DUET ایکٹ اور فنانشل اسٹیٹیوٹس 2021 کے مطابق واضح تحریری اختیار اور مناسب آڈٹ کے ساتھ چلائے جائیں۔
