کراچی: مدارس دینیہ کے سب سے بڑے بورڈ وفاق المدارس العربیہ پاکستان کے تحت ملک بھر کے مدارس کے طلباء کے مابین ہونے والے مسابقات حفظ قرآن کا سلسلہ اختتامی مراحل کی جانب زور و شور سے جاری ہے۔
میڈیا کوآرڈینیٹر وفاق المدارس مولانا طلحہ رحمانی نے تفصیلات بتاتے ہوئے کہا کہ صوبائی سطح کے دو مراحل میں پہلا مرحلہ آزاد کشمیر و گلگت بلتستان سمیت تین صوبوں سندھ،پنجاب اور خیبرپختونخوا میں مکمل ہوگیا ہے ۔
جبکہ بلوچستان میں یہ مرحلہ ستائیس دسمبر کو ہو گا۔جبکہ حتمی مراحل میں وفاق المدارس کے صدر مولانا مفتی محمد تقی عثمانی کی صدارت میں صوبہ سندھ کا کراچی میں 25 دسمبر، خیبرپختونخوا کا پشاور میں 26 دسمبر، پنجاب کا لاہور میں 27 دسمبر اور بلوچستان کا کوئٹہ میں 29 دسمبر کو ہو گا ۔
تمام پروگراموں کے مہمان خصوصی ناظم اعلیٰ وفاق المدارس مولانا محمد حنیف جالندھری ہیں،جبکہ دیگر معزز مہمانان گرامی میں اعلی سرکاری و تعلیمی شخصیات سمیت وفاق المدارس کے قائدین و منتظمین بھی شریک ہونگے،پروگراموں میں وفاق المدارس سے ملحق ہزاروں مدارس کو دعوت ناموں کا اجراء کر دیا گیا ہے ۔دیگر انتظامات کو بھی حتمی شکل دیدی گئی ہے۔
مذید پڑھیں : لاہور : محققین COMSTECH ایوارڈز برائے 2023 کے لیئے کیسے اپلائی کریں گے ؟
اسی حوالہ سے جامعہ علوم اسلامیہ علامہ بنوری ٹاؤن میں صوبائی ناظم مولانا امداداللہ یوسف زئی کی صدارت میں اجلاس ہوا،جس میں میڈیا کوآرڈینیٹر مولانا طلحہ رحمانی،مرکزی مسابقہ کمیٹی کے ڈپٹی کنوینئر مولانا عبدالوحید، مسؤلین میں مولانا قاری حق نواز، مولانا منظور احمد ،مفتی اکرام الرحمن، مولانا قاسم عبداللہ ،مولانا اظہار احمد، مولانا عبیدالرحمن چترالی سمیت دیگر شریک ہوئے ۔
اجلاس میں شریک ہونے والے مدارس کے ذمہ داران کو دعوت ناموں کی ترسیل سمیت دیگر امور پر گفتگو ہوئی،دریں اثناء صوبہ سندھ کے ڈویژنل سطح کے تمام پینسٹھ پوزیشن ہولڈرز طلباء کو انعامات دینے کی تقریب بھی جامعہ بنوری ٹاؤن میں منعقد ہوئی،جس میں جامعہ بنوری ٹاؤن کے استاد معروف مبلغ مولانا عمران عیسی نے خطاب کیا ۔
اس موقع پر مولانا طلحہ رحمانی،مولانا عبدالوحید، مولانا قاری زبیر احمد ،مولانا عمران عثمان، مولانا محمد فیصل، قاری محمد الیاس، مولانا محمد اسامہ حقانی، مولانا انیس الرحمن ،مولانا اسامہ خطیب سمیت کثیر تعداد میں مدارس کے ذمہ داران شریک ہوئے،جبکہ ناظم سندھ وفاق المدارس مولانا امداداللہ یوسف زئی نے صوبائی سطح کے ابتدائی مرحلہ کے نتائج کا اعلان کیا ۔
مذید پڑھیں : جامعہ کراچی : ڈاکٹر محمد اجمل خان انسٹی ٹیوٹ آف سسٹین ایبل ہیلوفائٹ یوٹیلائزیشن کے زیر اہتمام لیکچر کا انعقاد
صوبہ سندھ کے حتمی و فیصلہ کن مرحلے میں ٹاپ گیارہ پوزیشن ہولڈرز منتخب ہوئے۔جن طلباء نے پوزیشنیں حاصل کیں ان میں دارالعلوم مظاہر العلوم لطیف آباد حیدرآباد کے عبداللہ بن شاہجہان،ادارہ معارف القرآن کراچی کے عبدالرحمن بن محمد یوسف، مدرسہ سیدنا صدیق اکبر حیدر آباد کے محمد حسن رضا بن عبداللطیف،ادارہ معارف القرآن کراچی کے محمد جان بن عبداللہ جان،مدرسہ جامع القرآن عثمان بن عفان کراچی کے محمد جنید بن عبد العزیز،مدرسہ مریم تجوید القرآن شہید بینظیر آباد (نواب شاہ) کے حسنین احمد بن ارشاد احمد،مدرسہ سراجیہ ظہیریہ منظور کالونی کراچی کے حارث احمد بن مثقال الدین،مدرسہ مدینہ تجوید القرآن گھوٹگی کے محمد اسحاق بن محمد موسیٰ،مرکز العلوم الاسلامیہ منگھو پیر البدر مسجد کے عالیان عباسی بن عبدالماجد عباسی، دارالعلوم مظاہر العلوم لطیف آباد حیدرآباد کے محمد بن انیس،جامعہ اسلامیہ اشاعت القرآن والحدیث لاڑکانہ کے عبداللہ بن طالب حسین شامل ہیں جو بترتیب اول تا گیارہ پوزیشن پر آئے ہیں۔
تمام پوزیشن ہولڈرز کو نقد رقم کے ساتھ دیگر قیمتی انعامات سے بھی نوازا گیا۔تقریب میں اندرون سندھ سے آنے والے تمام طلباء کے اساتذہ اور سرپرستوں سمیت مسابقہ کے منصفین و مسابقہ کمیٹی کے اراکین کو بھی بہترین کارکردگی پر انعامات سے نوازا گیا۔
مولانا رحمانی کے مطابق صوبہ خیبرپختونخوا کے ناظم وفاق المدارس مولانا حسین احمد نے پشاور اور مرکزی مسابقہ کمیٹی پاکستان کے کنوینئر مولانا قاری احمد میاں تھانوی نے لاہور میں صوبائی سطح کے ابتدائی مرحلہ کے نتائج کا اعلان بھی کر دیا۔ جس کے تحت خیبرپختونخوا میں ٹاپ دس اور پنجاب میں ٹاپ بارہ طلباء صوبائی حتمی مرحلے کیلئے منتخب ہوئے۔
تمام پوزیشن ہولڈرز طلباء،ان کے اساتذہ اور والدین کو صدر وفاق المدارس مولانا مفتی تقی عثمانی وناظم اعلیٰ مولانا محمد حنیف جالندھری سمیت دیگر قائدین نے مبارکباد پیش کی۔اور مسابقات کیلئے بہترین انتظامات کے انعقاد پر صوبائی مسابقہ کمیٹیوں کے جملہ اراکین کی کارکردگی کو بھی سراہا ۔
